Шагдарсүрэнгийн Норжинбат нь аудит, нягтлан бодох бүртгэл, бизнесийн зөвлөх үйлчилгээний чиглэлээр 30 гаруй жил ажилласан арвин туршлагатай бөгөөд Онч & Компанийн удирдах зөвлөлийн гишүүн юм.

Тэрээр Монголын томоохон групп компаниудад бизнесийн үйл ажиллагааг сайжруулах мэргэжлийн зөвлөх үйлчилгээг үзүүлж ажиллахын зэрэгцээ бизнес эрхлэгчдийн олон төрлийн зөвлөлүүдэд гишүүнээр ажиллан өөрийн хувь нэмэр, мэдлэг туршлагаа хуваалцсаар ирсэн. Тэрээр 2015 оноос эхлэн "Монголын Урлагийн Зөвлөл" төрийн бус байгууллагын удирдах зөвлөлийн гишүүнээр ажиллан соёл урлагийг үйл ажиллагааг дэмжих үйл хэрэгт манлайлан оролцож ирсэн.

Түүний дэмжиж хэрэгжүүлсэн зарим төслүүдээс:

·      2015 он - 56 дахь удаагийн "Венецийн биенналь"-д Монгол улсын гаргасан анхны орчин үеийн урлагийн үзэсгэлэнг дэмжиж ажилласан.

·      2017 он - Дэлхийн яруу найрагчдын 37-р их хурлыг Монгол улсад амжилттай зохион байгуулж ажилласан.

·      2018 он - Үндэсний Номын Сангийн "Хосгүй үнэт ховор бүтээл"-ийн каталогийг ивээн тэтгэж оролцсон.

·      2019 он - АНУ-ын Бостон балетын тоглолтыг Улаанбаатар хотод тоглоход нь дэмжиж ажилласан.

·      2019 он - Монгол улсын анхны “Ганц цагаан шувуу” моно дуурийг дэмжиж ажилласан.

Зөвхөн урлагийн төслүүдийг дэмжиж ажиллахаас гадна 2006-2020 оны хооронд ЕБС-ийн сурагчдын дунд явагддаг хүүхдийн хөлбөмбөгийн "Дуулиан-2020" тэмцээнд нэр бүхий сургуулиудыг ивээн тэтгэж оролцуулж ирсэн.

Тэрээр “Art Exchange Hub”-ийг үүсгэн байгуулсан нь аливаа оюуны бүтээл болон түүний зохиогчийн эрхийг хамгаалах, бүтээлийг нийтэд хүртээмжтэй болгох тэрхүү эко системийг бий болгох зорилготой бөгөөд үүгээрээ дамжуулан олон нийтэд эерэг нөлөөллийг түгээх, соён гэгээрүүлэх, улмаар хамтран ажиллах шинэ шатны боломжийг бий болгохоор зорин ажиллаж байна. Бүтээлийн үнэ цэнэ, өгөөжийг нэмэгдүүлэхэд оролцож байгаа бүхий л талуудад зориулсан манай вэбсайтад тавтай морилж, саатан ажаамуй.

‍

Энхболдын Болорчулуун нь 1996 оноос хуульч, өмгөөлөгчөөр ажиллаж эхэлсэн бөгөөд өмгөөллийн “Сувд Партнерс” фирмийг 1999 онд байгуулан өмгөөлөгчдийн хамтран ажиллах хэлбэр, хамтын ажиллагааны нөхцөл, маркетингийг шинэлэг санаагаар хөгжүүлэхээр ажилласны хамт хуульчдын мэргэжлийн ёс зүй болон мэтгэлцэх ур чадварын давтан сургалтын сургагчаар ажилласан туршлагатай.

Энэ хугацаанд Монголын Өмгөөлөгчдийн Холбооны Удирдах Зөвлөлийн гишүүнээр 4 удаа сонгогдон ажилласанаас гадна 2007-2009 онд Нийслэлийн Өмгөөлөгчдийн Зөвлөлийн даргаар болон Монголын Үндэсний Худалдаа Аж Үйлдвэрийн Танхимын дэргэдэх Үндэсний Арбитрын арбитрчаар ажилласан. Түүнчлэн Авлигын эсрэг тухай хуульд заасан Авлигатай тэмцэх газрын дэргэдэх “Олон нийтийн зөвлөл”-ийн анхны дарга, Олон улсын JCI Монгол байгууллагын 2010 оны Үндэсний Ерөнхийлөгчөөр ажилласан.

Өнөөдрийг хүртэл буюу 30 жилийн хугацаанд оюуны бүтээлч хөдөлмөр эрхэлдэг зохиогчдын эрхийг хамгаалах чиглэлээр мэргэшин ажиллахдаа зөрчигдсөн эрхийг сэргээлгэх, учруулсан хохирлыг гаргуулах шаардлагыг хангуулахаар шүүхийн хэрэг хянан шийдвэрлэх ажиллагаанд ажиллаж байснаас гадна тэднийг эрхээ мэддэг байхад тусалж төсөл хэрэгжүүлж, зөвлөгөө өгч, сургалт зохион байгуулдаг.

Содномсамбуугийн Бямбажав нь Мэдээлэл технологийн салбарт GIS технологи, бизнес процессын загварчлал, системийн интеграцийн чиглэлээр мэргэшсэн технологийн мэргэжилтэн бөгөөд байгууллагуудын дижитал шилжилтийг бодит систем, платформын шийдлээр хэрэгжүүлэх чиглэлд ажиллаж ирсэн туршлагатай. Тэрээр төрийн болон хувийн хэвшлийн байгууллагуудад зориулсан дижитал платформ, интеграцийн архитектур, өгөгдөлд суурилсан шийдлүүдийг төлөвлөх, хэрэгжүүлэх чиглэлээр 5+ жилийн туршлага хуримтлуулсан.

Тэрээр нэгдсэн интеграцийн платформ, үндэсний газрын зургийн систем зэрэг томоохон дижитал төслүүдийн бизнес хөгжүүлэлт, системийн шийдэл, төслийн менежмент дээр ажиллаж, Монгол Улсын дижитал шилжилтийн бодит хэрэгжилтэд хувь нэмэр оруулж ирсэн.

"Art Exchange Hub"-ийн хүрээнд бүтээлч салбар, технологи, өгөгдөл болон хамтын ажиллагааг нэгтгэсэн нээлттэй экосистемийг хөгжүүлэхээр ажиллаж, оюуны бүтээлийг илүү хүртээмжтэй болгох, зохиогчийн эрхийг технологийн шийдлээр хамгаалах, улмаар бүтээлч эдийн засаг, технологи, өгөгдлийн огтлолцолд орших шинэ экосистемийг бий болгон оюуны өмчийг бүртгэх, хамгаалах, үнэ цэнд хүргэх дижитал шийдлүүдээр дамжуулан инноваци, хамтын ажиллагаанд суурилсан нийгэмд эерэг нөлөө бүхий шинэ боломжуудыг бий болгохоор ажиллаж байна.

‍

Отгонбаатарын Номин-Эрдэнэ нь Бизнесийн эрх зүйн чиглэлээр бакалаврын зэрэг эзэмшсэн бөгөөд оюуны өмч, зохиогчийн эрх, гэрээний эрх зүй болон бизнесийн эрх зүйн чиглэлээр мэргэжлийн мэдлэг, ур чадвараа хөгжүүлэн ажиллаж байна.

Тэрээр компанийн өдөр тутмын үйл ажиллагааг эрх зүйн хүрээнд дэмжих, гэрээ хэлцэл боловсруулах болон хянах, оюуны өмчийн эрхийг хамгаалах, бүтээлийг эдийн засгийн эргэлтэд оруулахтай холбоотой үйл ажиллагаанд оролцож, уран бүтээлчид болон бизнесийн байгууллагуудын хоорондын хамтын ажиллагааг эрх зүйн үндэслэлтэй, үр дүнтэй зохион байгуулахад хувь нэмэр оруулдаг.

Мөн оюуны өмчийн эрх эзэмшигч, уран бүтээлч, бизнесийн байгууллагуудын хэрэгцээ, зорилгыг ойлгон, эрх зүйн мэдлэгийг бизнесийн практиктай уялдуулах замаар талуудад үнэ цэн бүтээхийг зорин ажилладаг. Цаашид оюуны өмчийн эрх зүй болон бүтээлч үйлдвэрлэлийн хөгжлийн чиглэлээр мэргэшин, шинэ боломж, шинэлэг шийдлийг эрэлхийлдэг мэргэжилтэн болон хөгжих зорилготой.